The rain in Spain falls mainly in London

Ek het vandag weer twee waardevolle lewenslesse geleer en gevoel ek sal my nuutgevonde wysheid met julle deel.

Les 1: As dit nie NOU reen in London nie, beteken dit nie dat dit nie NET NOU gaan reen nie, inteendeel dit beteken juis dat die kans goed is dat dit net nou gaan reen. Reen is ook nie altyd hierdie "drizzle - singing-in-the-rain" tipe reen nie. Partykeer, soos vandag, is dit vet emmers vol reen wat sambrele opeet vir breakfast. As dit so reen is sambrele eintlik bloot van akademiese belang. Jy gaan ewe nat anderkant uitkom met of sonder een, jy gaan dalk net minder stupid lyk met een.

Les 2: Moet nooit dink dat iets nie erger kan raak as wat dit is nie. Dit kan, en as jy my geluk het, sal dit. So stap ek in die reen en wonder of ek nie vir sambreel moet platslaan, wat my spoed sal breek, en hardloop tot by die huis nie, toe 'n pragtige rooi bus verby my ry, deur 'n plas water en die water mooi verplaas tot reg bo op my. Alles in 'n oogwink. Sambrele help dan f... niks nie.
'n Paar sekondere lesse wat ek toe leer sommer so op die koop toe, is bv, mens kan nie hardloop met 'n nat jean nie, as jy lyk soos 'n nat hond laat 'n sambreel jou nie minder stupid lyk nie en, afstande is verder in die reen.

Tot volgende keer.

...aquarium (vervolg)

Daar is iets in die water...

'n Mens stap baie keer in London rond en verwonder jou aan die hoeveelheid mense wat net totaal en al van hulle trollies af is. Ons het bietjie hieroor getob en gespekuleer dat dit dalk iets in die water is wat die mense aantas. Ons het besluit om nadere ondersoek in te stel. Ons is London Aquarium toe om presies te sien wat in die water is.

Op pad Aquarium toe het ons natuurlik die nudiste op die oewer van die Teems aangetref. Daar was ook allerhande mense met kostuums en ballone en goed. Waar het al die mense vandaan ontsnap?

Die Aquarium het natuurlik ons vermoedens bevestig en ons loop nou ligvoet vir die water hier, en drink eerder bier.

Surrey Quays

Net om vir julle te wys waar ons rondloop in die aande terwyl julle 7 de laan en Egoli kyk. Daar loop nie baie ander mense dan daar rond nie, want hulle kyk seker ook 7 de laan.

Dis canary wharf in die agtergrond (die lang geboue). Dis waar die lanies bly. Hulle het die stuk water tussen ons en hulle gesit sodat ons nie daar kan uitkom nie. Ek dink hulle sal ons met pyl en boog aanval as ons probeer deur swem.