Retail Therapy

Ons het vandag ons toeris uniforms (jeans en K-way baadjies) aangetrek en die kommersiele binnekringe van London ingevaar. Ons misie was duidelik en eenvoudig: Verken Hamleys, Liberty en Harrods, en moet NIKS koop nie.

Eerste stop was Starbucks. Mens kan nie speelgoedwinkels aandurf op 'n lee maag nie. Twee koppies koffie en twee muffins. On to more important stuff.

Hamleys: 5 vloere vol speelgoed. Alles wat jy kan imagine, en nog 'n paar ander goed ook, soos 'n Barbie wat op 'n ponie verby jou galop in 'n rak vas. Daar is selfs 'n teddiebeer fabriek waar jy jou eie custom made teddie kan kry. Jy kan selfs vir hom 'n hartklop en 'n stem gee.

Liberty: Dis lekker, want dis duur. Ook vyf vloere in 'n pragtige ou victoriaanse (dink ek) gebou met alles van klere tot toasters. Daar is selfs 'n pool tafel in die mansklere afdeling, net as dekor, tussen die Vivian Westwoods en Ralph Laurens. Ek het 'n hoed aangepas van £135, maar hy het ongelukkig net nie lekker gesit nie.

Harrods: Jy moet eers deur die anti-fur protes buite die deur veg om in te kom, maar dan is dit alles die moeite werd. Die epitome van retail. Die matte in die plek lyk so smart, net om oor dit te stap voel soos 'n achievement. Die hoogtepunt was verseker die kos afdeling. Dit laat Woolies soos die soos die griek se kafee op die hoek lyk. Niks word net op 'n rak gepak of in 'n yskas gesit nie, nee meneer, dit word uitgestal. Hulle kam selfs die geelperskes se hare.

Raait kom ons kyk die prentjies (van bo na onder):

Anel speel Lego by Hamleys.
Stapel en Lego robot pose vir die foto. Stapel is die een links.
Oesters by Harrods.
Garnaal uitstalling by Harrods.
Pool tafel by Liberty.

Mission completed.

Greenwich

As bote, horlosies of kos jou ding is, dan gaan jy gek wees oor Greenwich. Dit is maar 'n klipgooi van ons af, het ons uitgevind na die tyd, nadat ons die trein gevat en halfpad om London gery het. Dit is letterlik stap-afstand van ons af, as mens net anderkant toe stap. Nou weet ons. Dit is 'n pragtige "village-like" plekkie in die hartjie van London. Anel het haarself verloor tussen al die kos-stalletjies, met allerhande goed soos Italiaanse kase, en olywe en vleisighede (selfs boerewors). Enige foodie se droom. Dan is daar natuurlik die museums en die park van waar mens kan uitkyk oor London-stad. Baie mooi plekkie en 'n lekker dag-uitstappie.

Ons blyplekkie II...(the sequel)

Hallo, alweer ek. As satilietfotos nie jou ding is nie, hier is nog fotos van ons woonstellietjie van nader af. Photography & Styling courtesy of Anel. Net om julle 'n bietjie van 'n behind-the-scenes te gee. Styling het die volgende behels: As daar 'n foto geneem word van die kombuis dan sit ons eers al die vuil skottelgoed en lee coke bottels in die sitkamer.

Tot volgende keer, baai.